Familja Strehuese Fatmire dhe Islam Musliu, SOS Nëna Eli Hasani dhe përfaqësues nga KOMF, Organizata për fëmijët pa kujdes prindëror – OFAP dhe SOS Fshatrat e Fëmijëve Kosovë shënuan Ditën Ndërkombëtare të Familjes së bashku me Komisionin për Shëndetësi dhe Mirëqenie Sociale në Kuvendin e Republikës së Kosovës.

15 maji – Dita Ndërkombëtare e Familjes këtë vit i dedikohet strehimit familjar si formë e mbrojtjes së fëmijëve dhe shënohet me moton: Hape Derën, Çele Zemrën, Bëhu Familje Strehuese!

Përgjatë këtij takimi, familja strehuese dhe SOS nëna ndanë përvojat dhe sfidat në kujdesin dhe rritjen e fëmijëve pa kujdes prindëror, por edhe kënaqësinë dhe përmbushjen emocionale që ju jep ky mision i tyre fisnik. Poashtu, ata bënë thirrje që të rritet numri i familjeve strehuese për fëmijët pa kujdes prindëror, sidomos në komunat ku nuk ka familje strehuese si dhe të rritet mbështetja ndaj familjeve strehuese.

Kryesuesja dhe deputetët e Komisionit shprehën vlerësimin e lartë për punën shumë të çmuar të familjeve strehuese dhe sos familjeve dhe u zotuan që do të bëjnë më të mirën me Projekt Ligjin për Shërbime Sociale dhe Familjare për të garantuar një kornizë ligjore që fuqizon mbrojtjen e fëmijëve pa kujdes prindëror dhe të gjithë qytetarëve në nevojë.