Koalicioni i OJQ-ve për Mbrojtjen e Fëmijëve – KOMF dhe SOS Fshatrat e Fëmijëve prezantuan propozimet për mbrojtjen e fëmijëve nga dhuna, në takimin e Koordinatores Kombëtare, Ministres Donika Gërvalla, me organizatat joqeveritare dhe strehimoret.

Në cilësinë e Koordinatores Kombëtare për Mbrojtje nga Dhuna në Familje, Dhuna ndaj Grave dhe Dhuna me Bazë Gjinore, Ministrja Donika Gërvalla, zhvilloi një takim të përbashkët me përfaqësues të organizatave joqeveritare dhe strehimoreve.

Gjatë takimit, Ministrja Gërvalla njoftoi për fillimin e procesit të planifikimit të prioriteteve për Strategjinë Kombëtare 2027–2031 dhe ftoi organizatat të kontribuojnë me rekomandime dhe propozime konkrete.

KOMF paraqiti një sërë rekomandimesh, duke theksuar nevojën për fuqizimin e komponentës së parandalimit përmes krijimit dhe zgjerimit të programeve dhe shërbimeve parandaluese për mbrojtjen e fëmijëve dhe fuqizimin e familjeve.

Ndër rekomandimet kryesore të paraqitura ishin:

• Themelimi i këshillimoreve familjare në komuna, në përputhje me Ligjin për Shërbime Sociale dhe Familjare;
• Krijimi dhe zbatimi i programeve për prindërim të mirë, të përcaktuara në Ligjin për Shërbime Sociale dhe Familjare;
• Rritja e inspektimit dhe mbikëqyrjes me qëllim të zbatimit efektiv të Protokollit për Parandalimin dhe Referimin e Dhunës në Institucionet e Arsimit Parauniversitar;
• Themelimi i linjës telefonike falas për mbrojtjen e fëmijëve në kuadër të Zyrës së Kryeministrit për Qeverisje të Mirë, siç parashihet me Ligjin për Mbrojtjen e Fëmijës;
• Themelimi i shtëpive për mbrojtjen e fëmijëve, bazuar në Ligjin për Mbrojtjen e Fëmijës;
• Përcaktimi i kostove për njësi për secilin shërbim social, si parakusht për zhvillimin e procedurave për blerjen e shërbimeve sociale nga sektori joqeveritar;
• Miratimi i Ligjit për Financat e Pushtetit Lokal, me qëllim krijimin e një granti të veçantë për shërbimet sociale dhe familjare dhe sigurimin e qëndrueshmërisë financiare të ofruesve të shërbimeve sociale.

KOMF mbetet i përkushtuar të kontribuojë në fuqizimin e sistemit të mbrojtjes së fëmijëve dhe familjeve në Kosovë.