Organizata Zë në bashkëpunim me Zyrën e Kryeministrit për Qeverisje të Mirë, në partneritet me Koalicionin e OJQ-ve për Mbrojtjen e Fëmijëve – KOMF organizuan konferencën nacionale për shënimin e Ditës Europiane të Logopedisë.

Gjatë konferencës u prezantua raporti mbi gjendjen aktuale të logopedisë në vendin tonë. Në Kosovë janë rreth 180 logopedë të licensuar, përderisa vetëm 6 logopedë janë të përfshirë në institucionet publike.

Përfaqësuesit nga institucionet publike, shoqëria civile dhe Universiteti diskutuan për rëndësinë e rritjes së vetëdijësimit lidhur me rolin e logopedëve, si dhe për nevojën e përfshirjes së tyre në institucionet publike shëndetësore, sociale dhe arsimore. Ky diskutim nënvizon rëndësinë e integrimit të shërbimeve logopedike në institucionet publike për të siguruar mbështetje të duhur për fëmijët dhe individët që kanë nevojë për shërbime të specializuara logopedike.

Dita Evropiane e Logopedisë shënohet me datë 6 Mars dhe simbolizon themelimin e Koalicionit të Organizatave të Logopedisë në Evropë, ESLA European Speech & Language Therapy Association, në 1988. Nga viti 2023, Kosova përfaqësohet në ESLA nga organizata “Zë”, si i vetmi shtet anëtar nga regjioni i Ballkanit Perëndimor.